Өмірбаян

Шеденов Өтеғали Қадырғалиұлы (1934 жылы 8 наурызда Атырау облысының Құрманғазы ауданы Азғыр ауылында дүниеге келген)-экономист, экономика ғылымдарының докторы (1979 ж.), Халықаралық ақпараттандыру академиясының (1995 ж.), ҚР әлеуметтік ғылымдар Академиясының, Еуразия Халықаралық экономикалық Академиясының (1998 ж.), Ресей жаратылыстану ғылымдары Академиясының мүшесі (академик) (2014 ж.), Қазақстан Республикасы Ұлттық Академиясының профессоры (2021 ж.). С.М.Киров атындағы Қазақ мемлекеттік университетінің экономика факультетін (1961 ж.) бітірген (қазіргі әл-Фараби атындағы ҚазҰУ), Ресей экономика университетінің аспирантурасын тәмамдап (бұрынғы Г.В.Плеханов атындағы Мәскеу халық шаруашылығы институты, 1965 ж.), сол жылы кандидаттық диссертациясын қорғады. Аспирантураны бітіргеннен кейін, Алматы халық шаруашылығы институтында (қазіргі Нархоз университеті, 1965-1978 жж.) ассистент, аға оқытушысы, доцент, декан болып қызмет атқарған, АХШИ, ААҚИ (қазіргі Қазақ бас сәулет-құрылыс академиясы, 1966-1985 ж.ж.) жанындағы Қазақ КСР ЖОО Министрлігінің ғылыми тобының жетекшісі қызметін атқарды. 1966-1978 жылдар аралығында Алматы қалалық комитеті мен облыстық партия комитетінің жетекші қызметкерлеріне арналған жоғары экономикалық мектебінің оқу бөлімінің меңгерушісі, ректоры қызметтерін атқарды. 1979 жылдан 2002 жылға дейін АСҚИ, ҚазХШИ (қазіргі ҚазҰАЗУ), әл-Фараби атындағы ҚазҰУ полиэкономика, экономикалық теория кафедрасының меңгерушісі қызметін атқарды. 1985-1989 жылдары Қазақ КСР Ғылым Академиясының өндіргіш күштерді зерттеу жөніндегі кеңесінің бөлім меңгерушісі және бір мезгілде төрағасының бірінші орынбасары болды. Ұзақ жылдар бойы Қазақ КСР «Білім» қоғамының Тексеру комиссиясының қоғамдық лекторы және төрағасы болды. 1995 жылдан 2002 жылға дейін әл-Фараби атындағы ҚазҰУ-нің Экономикалық теория кафедрасының меңгерушісі, Экономика және құқық институты директорының оқу-әдістемелік жұмысы жөніндегі орынбасары, ал 2002 жылдың күзінен бастап, әл-Фараби атындағы ҚазҰУ-нің Экономика және бизнес жоғары мектебінің «Экономикалық теория», «Менеджмент және маркетинг», «Бизнес- технологиялар» кафедраларының профессоры қызметін атқарды.